vendredi 11 novembre 2016

Fuguèt lo crime dins Granada

Robert Allan

Afficher l'image d'origine

I - Lo crime


Lo veguèron que marchava
entre de fusilhs
de lòng d'una lòng carrièra.
Lo veguèron qu'acimava
sus lei campàs fregs
encara estelats de l'auba.
Sagatèron Frederic
que ja tornava la lutz.
La chorma de sei borrèus
ausèt pas de l'encarar.
Pleguèron totei seis uèlhs.
Preguèron :
Nimai Diu te sauvariá !
S'amorrèt, mòrt, Frederic,
ambé de sang sus son frònt
e de plomb dins seis entralhas.
Fuguèt lo crime dins Granada,
Que lo sachètz ! Paura Granada ! Sa Granada !


II - Lo poèta e la mòrt


Lo veguèron que marchava
amb ela, solet, sens témer sa dalha.
Lo solelh èra ja sus la torre e la torre
ja lei martèus sus leis enclutges,
leis enclutges dei fargas.
Frederic parlava
en calinhant sa mòrt, e sa mòrt l'escotava :
Amòr qu'aièr, companha, dins mei vers,
glatissiá lo pic de tei paumas secas ;
amòr qu'a mon cant balhères ton gèu ;
amòr qu'a ma tragedia
porgiguères lo talh de ta dalha d'argent,
cantarai la carn que t'a defugida,
ambé leis uelhs que te ramentes
ambé tei cabèus qu'espolsava l'aura
e tei bocas rojas e de potons veusas.
Uèi coma aièr, caraca, mon amiga,
coma siáu bèn, sol ambé tu,
tras questeis auras de Granada ! Ma Granada !

III

Lo veguèron que marchava...
fargatz, amics,
ambé de pèiras, ambé de sòmis, dins l'Alhambra,
un montèu per lo poeta
sus una fònt que son aiga
plore e diga eternament :
Fuguèt lo crime dins Granada, sa Granada !

Aucun commentaire:

Enregistrer un commentaire